នា​ថ្ងៃ​ទី​២១​ ខែ​កញ្ញា​ ឆ្នាំ​២០២០​ វិទ្យាស្ថាន​សភា​កម្ពុជា​ និង​អតីត​សិក្ខាកាម​នៃ​កម្មវិធី​ បណ្តុះបណ្តាល​ការ​វិភាគ​សារពើពន្ធ​ (FACT)​ បាន​ចូលរួម​កម្មវិធី​ “ទិវា​កម្ពុជា​” តាមរយៈ​ប្រព័ន្ធ​ អនឡាញ​ ដែល​រៀបចំ​ដោយ​​ទី​ភ្នាក់ងារ​ស៊ុយអែត​ ដើម្បី​កិច្ច​សហប្រតិបត្តិការ​ និង​អភិវឌ្ឍន៍​អន្តរជាតិ​ (Sida)​ នៅ​ទី​ក្រុង​ស្តុកខូម​ (Stockholm) សម្រាប់​អាជ្ញាធរ​ស៊ុយអ៊ែត​ ដែល​បំពេញ​ការងា​នៅ​កម្ពុជា​ ជា​ពិសេស​ជាមួយ​កម្មវិធី​ភាព​ជា​ដៃ​គូ​សម្រាប់​គណនេយ្យភាព​ និង​តម្លាភាព​ (PAT)​។

       គោលដៅ​នៃ​កម្មវិធី​កន្លះ​ថ្ងៃ​នេះ​ គឺ​ដើម្បី​បិទ​បញ្ចប់​ដំណាក់កាល​ទី​១​ នៃ​កម្មវិធី​ PAT​ ដោយ​ប្រមូល​ផ្តុំ​ឲ្យ​មាន​ការ​ចូលរួម​ពី​អ្នក​ពាក់ព័ន្ធ​ ដើម្បី​ចែករំលែក​នូវ​បទពិសោធន៍​ និង​ការ​យល់​ឃើញ​ទៅ​វិញ​ទៅ​មក​ ។ ក្នុង​កម្មវិធី​នេះ​ មាន​ការ​ធ្វើ​បទបង្ហាញ​លើ​ប្រធានបទ​ជា​ច្រើន​ រួមមាន​ទាំង​ប្រធានបទ​ទាក់ទង​នឹង​ផល​ប៉ះពាល់​នៃ​វីរុស​ Covid-19​ ចំពោះ​កម្ពុជា​ លើ​វិស័យ​សេដ្ឋកិច្ច​ ភាព​ក្រីក្រ​ និង​បញ្ហា​ប្រឈម​នៃ​ស្ត្រី​ក្នុង​ភាព​ជា​អ្នក​ដឹកនាំ​ជាដើម​ ។​ ក្នុង​នោះ​ក៏​មាន​កិច្ច​ពិភាក្សា​ផង​ដែរ​ ពី​មេរៀន​ពី​ការ​អនុវត្ត​កម្មវិធី​ PAT​ និង​ទិសដៅ​បន្ត​ ។

       ឆ្លៀត​ក្នុង​ឱកាស​នោះ​ អតីត​ប្រធាន​ក្រុម​កម្មវិធី​ FACT​ ដោយ​សហការ​ជាមួយ​នឹង​អតីត​សិក្ខាកាម​នៃ​កម្មវិធី​នេះ​ ដែល​បច្ចុប្បន្ន​ត្រូវ​បាន​ធ្វើ​សមាហរណកម្ម​បញ្ចូល​ទៅ​ក្នុង​នាយកដ្ឋាន​ស្រាវជ្រាវ​ថវិកា​ នៃ​ព្រឹទ្ធសភា​កម្ពុជា​ បាន​ចែក​រំលែក​ពី​ការ​យល់​ឃើញ​ចំពោះ​ របាយការណ៍​ស្ថិតិ​ផ្នែក​យេនឌ័ ​ស្តីពី​ បញ្ហា​ប្រឈម​របស់​ស្ត្រី​ក្នុង​ភាព​ជា​អ្នក​ដឹកនាំ​៖ ការ​រក​ឃើញ​សំខាន់ៗ​ ពី​ការ​វិភាគ​ស្ថិតិ​យេន​ឌ័រ​ ។​

របាយការណ៍​នេះ​ត្រូវ​បាន​បោះពុម្ព​ផ្សាយ​ដោយ​អគ្គលេខាធិការដ្ឋាន​ នៃ​រដ្ឋសភា​កម្ពុជា​ ។