កម្មវិធី​បិទ​សិក្ខាសាលា​បណ្តុះបណ្តាល​តាម​ប្រព័ន្ធ​អនឡាញ​ស្តីអំពី​ការទទួលខុសត្រូវ​សភា​ត្រូវ បាន​ធ្វើឡើង​នៅថ្ងៃ​បញ្ចប់​នៃ​សិក្ខា​សាលា​ នាថ្ងៃ​ទី​០៦​ ខែ​វិច្ឆិកា​ ឆ្នាំ​២០២០​។ កម្មវិធី​ត្រូវបាន​ចូលរួ​ម​ជា​អធិបតី​បិទ​ដោយ ​ឯកឧត្តម​ ស្រ៊ុន តារា​ អគ្គ​លេខា​ធិការ​រង​នៃ​រដ្ឋសភា​នៃ​ព្រះ​រាជា​ណាចក្រ​កម្ពុជា​ និង​លោកជំទាវ​ Nguyen Tuong Van អគ្គ​លេខា​ធិការ​ AIPA​។

ក្នុង​កម្មវិធី​នេះ​ដែរ​ ក៏មាន​ការ​ចូលរួម​ពី​វាគ្មិន​ និង​​អ្នកសម្រប​សម្រួល​ រួម​ជាមួយ​មន្ត្រី​តំណាង​មកពី​សភា​ដែលជា​សមាជិក​ AIPA​ រួមមាន​    កម្ពុជា​ ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ វៀតណាម AIPA និង​ វិទ្យាស្ថាន KPI​។ ក្នុង​ចំណោម​មន្ត្រីចំនួន​៥៤រូប ដែល​ចូលរួ​ម​ក្នុង​សិក្ខាសាលា​បណ្តុះ​បណ្តាល​រយៈពេល​ប្រាំ​សប្តាហ៍នេះ​ ​ ក្នុងនោះ​មាន​ ៤៨រូប​បាន​ទទួល​វិញ្ញាបនបត្រ​បញ្ចប់​ និង​វិញ្ញាបនបត្រចូលរួម ប្រកបដោយជោគជ័យ។

សិក្ខា​សាលា​បណ្តុះ​បណ្តាល​តាម​ប្រព័ន្ធ​អនឡាញ​ ដែលបាន​រៀបចំ​ដោយ​វិទ្យាស្ថាន​សភា​កម្ពុជា​ (វសក)​ គឺជា​វេទិកា​ដើម្បី​ផ្លាស់ប្តូរ​ចំណេះដឹង​ និង​ចែក​រំលែក​ទម្លាប់​អនុវត្ត​ល្អៗ​ស្តីអំពី​មុខងារ​ចម្បងៗ​ទាំងបី​របស់​សភា​ ដែលរួមមាន មុខងារ​តាក់តែង​ច្បាប់​ មុខងារ​តំណាង​ និង​មុខងារ​ត្រួតពិនិត្យ​។ សិក្ខាសាលាបណ្តុះ-   បណ្តាលនេះបានអញ្ជើញវាគ្មិនមកពី AIPA ព្រឹទ្ធសភា​និង​រដ្ឋសភា​បារាំង​ សភា​នៃ​រដ្ឋ​ Zurich​ សភា​នៃ​រដ្ឋ​ Ontario និងវិទ្យា​ស្ថាន​សភា​កម្ពុជា​ ដើម្បីចូលរួមធ្វើបទបង្ហាញក្រោម​ប្រធាន​បទ ​«ទិដ្ឋភាព​ទូទៅ​នៃ​ការទទួលខុសត្រូវ​របស់​សភា​៖ ការពង្រឹង​ស្ថាប័ន​»។​

ចំណុច​នៃ​ការពិភាក្សា​សំខាន់ៗ​នៃ​សិក្ខាសាលា​បណ្តុះ​បណ្តាល​នេះ​រួមមាន​ ការយល់ដឹង​ពី​រចនា​សម្ព័ន្ធ​ខុស​ៗគ្នា​នៃ​ប្រព័ន្ធ​សភា​និង​ការអនុវត្ត​, វិធីសាស្ត្រ​​ផ្សារភ្ជាប់​សភា​ទៅនឹង​ពលរដ្ឋ​របស់​ខ្លួន​តាមរយៈ​មុខងារ​តំណាង​, ឧបករណ៍ដែល​សភា​ប្រើ​ដើម្បី​ត្រួតពិនិត្យលើរដ្ឋាភិបាលដើម្បីឱ្យមានតុល្យភាព​​។ ចំណុច​មួយ​ផ្សេងទៀត​នៃ​កិច្ចពិភាក្សា​គឺ​ ការទូត​សភា​ដែលជា​ឧបករណ៍​ដ៏មាន​តម្លៃ​ដើម្បី​ពង្រឹង​ទំនាក់​ទំនង​អន្តរ​ជាតិ​នៅក្នុង​តំបន់​អាស៊ាន​ និង​សកលលោក​។

នៅក្នុង​សុន្ទរកថា​របស់​ឯកឧត្ត​ម ស្រ៊ុន​ តារា​ ឯកឧត្តម​បានថ្លែង​អំណរគុណ​ដល់​វិទ្យាស្ថាន​សភា​កម្ពុជា​ដែលបាន​រៀបចំ​ព្រឹត្តិការណ៍​នេះ​ ដោយ​បន្ថែមថា​ «ដំណើរការ​នៃ​ការផ្លាស់ប្តូរ​ចំណេះដឹង​ និង​ការបង្កើត​ទំនាក់ទំនង​ គឺមានសារសំខាន់ក្នុងការចូលរួម​ចំណែក​ដល់​ការ​ពង្រឹង​ស្ថាប័ន​សភា​ ដែល​បានកកើតឡើង​បន្ទាប់ពី​​ពេលវេលា​​ដ៏​​លំបាក​​ ដើម្បី​អាច​ទទួលបាន​ផលប្រយោជន៍​ពី​ការសិក្សា​អំពី​ការអនុវត្ត​ផ្សេងៗ​នៃ​សភា​»។

លោកជំទាវ​ Nguyen​ Tuong Van អគ្គ​លេខាធិការ​ AIPA​ បាន​ថ្លែងអំណរគុណ​ដល់​វិទ្យាស្ថាន​សភា​កម្ពុជា​ ក្នុងការ​រៀបចំ​វគ្គ​បណ្តុះ​បណ្តាល​សិក្ខា​សាលានេះ​។ លោកជំទាវ​ក៏​សំដែង​នូវការ​កោត​សរសើរ​ដល់​វាគ្មិន​ ចំពោះ​ការចូលរួម​ចំណែក​ដល់​ភាព​ជោគជ័យ​នៃ​សិក្ខាសាលា​បណ្តុះបណ្តាល​នេះ។ លោកជំទាវ​ក៏​បានសំដែង​សេចក្តី​សង្ឃឹម​ថា​ «នាពេលអនាគត​ វិទ្យាស្ថាន​សភា​កម្ពុជា​ រួមគ្នាជាមួយ AIPA នឹង​រៀបចំ​សិក្ខា​សាលានេះ​ ​ ដោយសារ​តែ​សិក្ខាសាលា​នេះ​មានអត្ថប្រយោជន៍​សម្រាប់​សភា​ដែលជា​សមាជិក​របស់​ AIPA​»។